Saturday, September 6, 2008

مكسرات رمضان



السلام عليكم ورحمه الله وبركاته


كـــــــــــــــــــــــــل سنة وانتــــو طيــبــيـــن




فيه حاجات كتييييييير عايزة اقولها شوية مكسرات هحطها علي بلوجي بمناسبة رمضان




~*¤ô§ô¤*~ افطار في وسط السحاب
~*¤ô§ô¤*~


السنة اللي فاتت .. يوم 13 رمضان . كان يوم سفر بالنسبالنا .. كنا راجعين مصر .. بعد قضاء 12 يوم من رمضان مع أبي في ايطاليا ونوينا كلنا الصيام علي الرغم من أنة سفر ..بأعتبار يعني اننا مكناش هناخد ناقة .. العربية ... والقطر .. والطائرة .. وفعلا الحمد لله الرحلة مكنتش متعبة .. ولقينا ان كل المصريين اللي في الطائرة صائمين ان Egypt Air
مظبطة أنها تقدم الوجبة في وقت المغرب بالظبط .. وواحد ربنا يكرمة .. وزع تمر علي الطائرة كلها متخيل نفسك وأنت بتقول ..
"اللهم لك صمت و على رزقك أفطرت و عليك توكلت و بك آمنت ذهب الظمأ و أبتلت العروق و ثبت الأجر بإذنك يا واسع الفضل اغفر لي الحمد لله الذي أ‘انني فصمت و رزقني فأفطرت" وتبص علي يمينك .. تلاقي السحاب لونة .. بيتدرج .. من البمبي .. للبرتقالي متخيل أنك .بتبفطر .. وبدل مانت ما شايف السحاب وقت الغروب من تحت .. انت شايفة من فوق متخيل وانت بتاكل التمر .. ومدرك أنك بتطبق سنة نبيك من السماء بحق .. كان أجمل افطار في حياتي حتي الأن __ومحدش يجي يقوللي انة في مرة فطر تحت الأرض .. في مترو الأنفاق

:D






~*¤ô§ô¤*~ رمضــان السنــادي .. طــعمة مش عــــادي ~*¤ô§ô¤*~


رمضان السنادي طعمة مش عادي .. رمضان السنادي اول رمضان (من 18 سنة ) .. نتجمع فيه انا واسرتي في مصر .. بجد .. شايفة كل حاجه شكلها مختلف .. السحور ليه طعم تاني .. والافطار .. حتي الزينة اللي في الشارع أكتر من اي سنة فاتت ده مخليني أفكر .. ان محدش بيحس بقيمة اللي معاه .. غير لما يفتقده .. فرحانة اوي .. حاسة ان اخيرا .. بعد سنين صيام منغير أسرتي .. او سنين صيام معاهم منغير بلدي .. أخيرا بنشرب تمر علي الفطار .. وبنسمع الاذان من المساجد .. ونسمع النقشبندي بعد الأذان علي الراديو وكمان بتفرج علي ظاظا وجرجير كــلـــنـــا مـــع بـــعـــض





~*¤ô§ô¤*~ ســنــة أولـــي صيـــــام ~*¤ô§ô¤*~

الأء أختي السنادي .. سنة أولي صيــام .. واحنا فرحانين بيها جداااااا

بجد رائعة ما شاء الله .. اقل من 8 سنين .. وبتقوم تتسحر في "جوف الليل" ومستحملة الحر ده .. مع العطش والجوع

بجد جميلة





~*¤ô§ô¤*~ افطار كل الطلبة ~*¤ô§ô¤*~



لثالث سنة علي التوالي بحضر الافطار السنوي لموقع كل الطلبة .. اللي انا مشتركة فيه

لكن السنادي.. وبشهاده الجميع ..هوأجمل افطار

أشتغلنا كلنا .. فكرنا كلنا .. نظمنا كلنا


ونجحنا كلنا


:)


Saturday, March 15, 2008

ســــــــــارة


ســـارة .. أختي الكبيرة .. أكبر مني بسنتين بس ..
مع أنها اقصر مني :D
المهم .. عمري ما حسيت ان فيه فرق بيني وبيها .. في السن او كده .. انا وهي عمرنا ما بعدنا عن بعض .. ولو يوم واحد
يمكن نكون سافرنا منغير بابا وماما .. كذا مرة
بس كنا دائما بنبقا مع بعض .. دائما سارة وسميه .. عمرنا ما كنا بعاد
سارة بقا .. في كليه العلوم .. ويوم الثلاثاء اللي فات سااااااااافرت منغيري :(
راحت سيناء .. رحلة جيولوجيه تبع كليتها
هي هترجع النهارده بالليل باذن الله
بس بجد ... بجد .. وحشاااااااااااااااااااااااني جدااااااااااااااااااااااااااا
حاسة كده ان البيت فاضي منغيرها .. هي اينعم مكنتش بشوفها كتير .. بس لما بنقعد فوق السرير نرغي ونتكلم .. وتحكيلي عن اللي بيحصل عندها في الكليه .. واصحابها وكدة
بسسسسسسسسسس
أدعولنا بقا ربنا يخلينا لبعض :D

Monday, February 4, 2008

أخـــذوا عـــمري


عندي كلام كتير عايزة اقولة .. بس مينفعش اقولة هنا
بس أخر ما في الكلام ده .. هو اني عندي حق عند ناس
خدو مني اكـتر شئ ممكن يكون غالي علي اي حد
خدو مني حتة من عمري .. خدو مني حوالي ثلث عمري
بجد !!!
تخيل حد يسرق منك 5 سنين من عمرك ؟
انا مش مســامحاهم .. :(
عمري ما حسيت الشعور ده لحد ..
بس بجد مش مسامحاهم
وعايزة حقي منهم
ايوة .. عايزاهم يرجعولي سنين عمري اللي سرقوها ..
غير كده .. هاخدها منهم يوم القيــامة
انا عارفة ان كلامي ده مش هيوصلهم
بس واثقة ان احساسي واصلهم .. انا مش مسامحاهم
ومش هسامحهم غير لما يرجعولي حقي اللي خدوة

Monday, January 14, 2008

ربــي أجمــعهما


ان أعيننا لتدمع .. وان قلوبنا لتحزن .. وانا لفراقكما لمحزونون









عصــام .. قريبي .. كان فرحة يوم الجمعه اللي فاتت .. رقص واتنطط وكانت الدنيا مش سايعاه



كان عامل فرح جميل .. والكوشة بيقولو كانت حلوة اوي



كان قاعد فيها هو وعروستة



كانو مبسوطين جدا



أخر شئ .. والدتة شافتو ماسك عروستة وطالع الشقة



هو كان واخد الدور الثالث .. بعد دور أمة .. ودور أخواتة الأتنين



طبعا الدنيا مش سايعاها .. عصام .. أحب اولادها الي قلبها وأصغرهم ( 23 سنة ) .. اتجوز .. وواخد عروستة وطالع شقتة





الساعه 2 بالليل





اخوة اللي في الدور اللي تحتة علي طول .. سمع دربكة مش شقة عصام .. من الحمام تحديدا



طبعا شئ وارد .. ومينفعش يحرج نفسة ويطلع يخبط ويسال فيه ايه ؟؟





الساعه 8 الصبح



تصحي والدتة من النوم .. وتفكر بينها وبين نفسها



" أخص عليك يا عصام بقا كده متنزلش لأمك تصبح عليها وتطمنها عليك "


بعد العصر .. يجو اهل العروسة لزيارتها .. فيطلعو هما واهلو يخبطو علي العرسان .. لكن مفيش رد

كسرو باب الشقة

دورو عليهم في الشقة

باب الحمام مقفول من جوا

"عصاااااااااام .. عصااااااااااااااااااام رد عليا يا عصام أنا أمك"

مفيش فايدة .. كسرو باب الحمام

عصام ورا الباب .. واقع علي الارض .. جبينة مجروح

لابس البرنص بتاعه الاحمر .. اللي اول مرة يلبسو

عروستة .. واقعه في البانيو .. الممتلئ بالماء

لابسة ثوب نومها

تجري أمة عليه .. تحضنة .. مالك يا عصام ؟؟ رد عليا يا حبيبي ؟؟

شدوها بعيد عنة .. واتصلو بالدكتور .. علي أمل انهم يكونو في حالة اغماء او حاجه

جيه الدكتور : البقاء لله يا جماعه

توفي عصام

أنهارت أمة

حضرت المباحث

السخان اصلة غاز .. ولقو الأمبوبة فاضية .. بس مفيش ريحة

يبقا أختنقو في الحمام

هي داخت ووقعت في البانيو .. وفضلت في الماية من 2 بالليل ل 4 العصر

وهو ممكن يكون كان بيحاول فتح ترباس الحمام .. لكنة من الدوخة مقدرش

هي دي الدربكة اللي كان سامعها أخوة في الحمام

مشي الدكتور .. وبالوساطة استخرجو أذن دفن الجثتين

يااااااه هما بقو جثتين خلاص ؟؟

العروسين بقو جثتين

اةةةةةةةةةةةةةةةةةة

العروسين اللي كانو جمب بعض في الكوشة .. تاني يوم .. بقو جثث ؟؟

أم العريس .. بقت أم المرحوم ( ان شاء الله ) ؟

يااه علي أم العريس

ياااه عليها .. لما حضنتو في الحمام .. وطالبت أنة يرد عليها

يااه .. لما حكيت قد ايه هو كان جميل في الكوشة

يااه .. لما قالت انها لو كانت تعرف انة هيموت كده ..

مكنتش سابتو يطلع شقتة .. كانت خلتو يفضل جمبها تملأ عينيها بيه

مكنتش سابتو يطلع مع عروستة

قالت انها كانت حاسة ان فيه حاجه هتحصل .. بس مكنتش متخيلة ان حبيبها عصام هيحصلة حاجه

شقة عصام .. جهاز العروسة .. هيفضلو كده طول العمر

يذكروهم ان كان فيه هنا عصام .. وكان فيه هنا بنت أهلها سابوها في ثوب أبيض .. وأخذوها في ثوب أخر بلا أكمام

صور الفرح والفيديو .. هيفكروهم ان القمرين دول .. كانو فرحانين اوي

وكانو جمال اوي

وكانو فاكرين ان قدامهم عمر طويل يقضوة مع بعض

مكانوش بيفكرو في الموت

مكانوش متخيلين انة قريب كده منهم

واقف شبر واحد بعيد عن الكوشة

العروسين اللي كانو بيزفوهم .. أهم دلوقتي بيغسلوهم .. ويكفنوهم .. ويصلو عليهم

صلو عليهم 1 بالليل ..

وعلي الرغم من تأخر الميعاد .. وبرد الجو كانت اكبر صلاه جنازة اشوفها في حياتي ..

المصلين ملو المسجد .. وكانو بيصلو في الشارع كمان

عصام وعروستة .. بدل ما يقضو تاني ليلة ليهم مع بعض

قضوتاني ليلة ليهم بعاد عن بعض .. هو في مقابر أهلة .. وهي في مقابر عائلتها في الشرقيه

كان أول لقاء بينهم في الشغل .. وأخر لقاء ليهم في خشبتين متجاورتين في مسجد

.

.

.

ربــي أرحمهما

ربــي أجمعهما













Wednesday, January 9, 2008

هَذِي بـِلادٌ .. لمْ تـَعُـــدْ كـَبـِلادِي










كم عشتُ أسألُ: أين وجــــــــهُ بــــلادي
أين النخيلُ وأيـن دفءُ الــوادي
لاشيء يبدو في السَّمـَــاءِ أمـامنــــــــــا
غيرُ الظـلام ِوصــورةِ
الجــلاد
هو لا يغيبُ عن العيــــــــون ِكأنــــــــه
قدرٌٌ .. كيوم ِ البعــثِ والميــــلادِ
قـَدْ عِشْتُ أصْــــرُخُ بَينـَكـُمْ وأنـَـــــادي
أبْنِي قـُصُورًا مِنْ تِـلال ِ
رَمَـــادِ
أهْفـُـو لأرْض ٍلا تـُسـَـــاومُ فـَرْحَتـِــــي
لا تـَسْتِبيحُ
كـَرَامَتِي .. وَعِنَــادِي
أشْتـَـاقُ أطـْفـَـــــالا ً كـَحَبــَّاتِ النـَّــــدَي
يتـَرَاقصُونَ مَـعَ الصَّبَاح ِالنـَّادِي
أهْـــفـُــــو لأيـَّـام ٍتـَـوَارَي سِحْــرُهَـــــا
صَخَبِ الجـِيادِ.. وَفرْحَةِ الأعْيادِ

اشْتـَقـْــــتُ يوْمـًا أنْ تـَعـُــودَ بــِــــلادِي
غابَتْ وَغِبْنـَا .. وَانـْتهَتْ ببعَادِي
فِي كـُلِّ نَجْــم ٍ ضَــلَّ حُلـْـــٌم ضَائـِـــــع ٌ
وَسَحَابَــة ٌ لـَبسـَـتْ ثيــَـابَ
حِدَادِ
وَعَلـَي الـْمَدَي أسْـرَابُ طـَيــر ٍرَاحِــــل ٍ
نـَسِي الغِنَاءَ فصَارَ سِـْربَ جَرَادِ
هَذِي بِلادٌ تـَاجَـــرَتْ فــِـي عِرْضِهـــَــا
وَتـَفـَـرَّقـَتْ شِيعًا بـِكـُـــلِّ مَـــزَادِ
لـَمْ يبْقَ مِنْ صَخَبِ الـِجيادِ سِوَي
الأسَي
تـَاريخُ هَذِي الأرْضِ بَعْضُ جِيادِ
فِي كـُلِّ رُكـْن ٍمِنْ رُبــُــوع بـِـــــلادِي
تـَبْدُو أمَامِي صـُورَة
ُالجــَــــلادِ
لـَمَحُوهُ مِنْ زَمَن ٍ يضَاجـِــعُ أرْضَهَـــا
حَمَلـَتْ سِفـَاحًا فـَاسْتبَاحَ الـوَادِي
لـَمْ يبْقَ غَيرُ صـُـرَاخ ِ أمـْــس ٍ رَاحـِـل ٍ
وَ
مَقـَابـِر ٍ سَئِمَتْ مـِــنَ الأجْـــدَادِ
وَ
عِصَابَةٍ سَرَقـَتْ نـَزيــفَ عُيـُـونِنـَــــا
بـِالقـَهْر ِ والتـَّدْليـِس ِ.. والأحْقـَادِ
مَا عَادَ فِيهَا ضَوْءُ نـَجْــــم ٍ شـَــــــاردٍ
مَا عَادَ فِيها صَوْتُ طـَير ٍشـَـــادِ
تـَمْضِي بـِنـَا الأحْزَانُ سَاخِــــرَة ًبـِنـَــا
وَتـَزُورُنـَا دَوْمــًا بـِـلا مِيعــَـــادِ
شَيءُ تـَكـَسَّرَ فِي عُيونـِــــي بَعْدَمَـــــا
ضَاقَ الزَّمَانُ بـِثـَوْرَتِي وَعِنَادِي
أحْبَبْتـُهَا حَتـَّي الثـُّمَالـَـــــة َ بَينـَمـَــــــا
بَاعَتْ صِبَاهَا الغـَضَّ
للأوْغـَــادِ
لـَمْ يبْقَ فِيها غَيـرُ صُبْــح ٍكـَـــــــاذِبٍ
وَصُرَاخ ِأرْض ٍفي لـَظي اسْتِعْبَادِ
لا تـَسْألوُنـِي عَنْ دُمُـوع بــِــــــلادِي
عَنْ حُزْنِهَا فِي لحْظةِ
اسْتِشْهَادِي
فِي كـُلِّ شِبْر ٍ مِنْ ثـَرَاهـَا صَــرْخَـــة ٌ
كـَانـَتْ تـُهَرْولُ خـَلـْفـَنـَا وتـُنَادِي
الأفـْقُ يصْغُرُ .. والسَّمَــاءُ كـَئِيبـَـة ٌ
خـَلـْفَ الغُيوم ِأرَي جـِبَالَ سَـوَادِ
تـَتـَلاطـَمُ الأمْوَاجُ فـَــوْقَ رُؤُوسِنـَــــــا
والرَّيحُ تـُلـْقِي للصُّخُور ِعَتـَادِي
نَامَتْ عَلـَي الأفـُق البَعِيـــدِ مَلامــــــحٌ
وَتـَجَمَّدَتْ بَينَ الصَّقِيـِع أيـــَـــادِ
وَرَفـَعْتُ كـَفـِّي قـَدْ يرَانـِي عَاِبـــــــــرٌ
فرَأيتُ أمِّي فِي ثِيـَــابِ حـِـــــدَادِ
أجْسَادُنـَا كـَانـَتْ تـُعَانـِـــقُ بَعْضَهـَــــا
كـَوَدَاع ِ أحْبَــابٍ بــِــلا مِيعـَــادِ
البَحْرُ لـَمْ يرْحَمْ بَـرَاءَة َعُمْرنـَـــــــــا
تـَتـَزاحَمُ الأجْسَادُ .. فِي الأجْسَادِ
حَتـَّي الشَّهَادَة ُرَاوَغـَتـْنــِي لـَحْظـَــة ً
وَاستيقـَظـَتْ فجْرًا أضَاءَ فـُؤَادي
هَذا قـَمِيـصـِـــي فِيهِ وَجْــــهُ
بُنـَيتــِي
وَدُعَاءُ أمي ..”كِيسُ”مِلـْح ٍزَادِي
رُدُّوا إلي
أمِّي القـَمِيـــصَ فـَقـَـدْ رَأتْ
مَالا أرَي منْ غـُرْبَتِي وَمُـرَادِي
وَطـَنٌ
بَخِيلٌ بَاعَنــي فـــــي غفلـــــةٍ
حِينَ اشْترتـْهُ
عِصَابَة ُالإفـْسَـــادِ
شَاهَدْتُ مِنْ خـَلـْفِ الحُدُودِ مَوَاكِبــًـا
للجُوع ِتصْرُخُ فِي حِمَي الأسْيادِ
كـَانـَتْ حُشُودُ المَوْتِ تـَمْرَحُ حَوْلـَنـَا
وَالـْعُمْرُ يبْكِي .. وَالـْحَنِينُ ينَادِي
مَا بَينَ عُمْـــــر ٍ فـَرَّ مِنـِّي هَاربـــــًـا
وَحِكايةٍ يزْهـُــو بـِهـَـــا أوْلادِي
عَنْ عَاشِق ٍهَجَرَ البـِلادَ وأهْلـَهـــــــَـــا
وَمَضي وَرَاءَ المَال ِوالأمْجـَـــادِ
كـُلُّ الحِكـَايةِ أنَّهـــَـــا
ضَاقـَتْ بـِنـَـــــا
وَاسْتـَسْلـَمَتَ لِلــِّـصِّ والقـَـــوَّادِ!
في لـَحْظـَةٍ سَكـَنَ الوُجُودُ تـَنـَاثـَـــرَتْ
حَوْلِي مَرَايا المَوْتِ والمِيـَـــلادِ
قـَدْ كـَانَ آخِرَ مَا لـَمَحْتُ عـَلـَي الـْمَـدَي
وَالنبْضُ يخْبوُ ..
صُورَة ُالجـَلادِ
قـَدْ كـَانَ يضْحَـكُ وَالعِصَابَة ُحَوْلـَــــــهُ
وَعَلي امْتِدَادِ النَّهْر يبْكِي الوَادِي
وَصَرَخْتُ ..وَالـْكـَلِمَاتُ تهْرَبُ مِنْ فـَمِي
:
هَذِي بـِلادٌ .. لمْ تـَعُـــدْ كـَبـِلادِي


فاروق جويدة .














القصيده دي .. لفاروق جويده .. القاها علي ال10 مساءا


وهي لضحايا عبارة السلام89




حقيقي مؤثرة جدا .. وفيها معاني كتير قوية جدا










علي فكرة


وحشتوني اوي

Tuesday, October 9, 2007

يـا راحــلا عن الحيـــاة



السلام عليكم ورحمه الله وبركاته



بقالي كتير مكتبتش .. اخر بوست كان لاستقبال رمضان .. وادينا ودعناه:(


يااااااه .. اجمل شهر في السنة خلاص انتهي ..


زي ما بينتهي كل سنة ..


وبيجي رمضان .. وتبتدي معاه الذكريات .. كم الذكريات اللي في رمضان مهول جدا


وبالنسبالي انا .. بعيدا عن ذكري الفانوس اللي قدمت شوية

عندي ذكري .. عمرها 3 سنين .. وذكري عمرها سنة واحده

فالاولي كانت ذكري وفاه جدتي .. ليلة رمضان

وتاني ثكري .. فكانت ذكري وفاه جدي .. ليلة 27 رمضان العام الماضي

واخيرا .. زرتهم .. يوم الجمعه اللي فاتت

كانت تاني مرة اروح لجدتي .. واول مرة اروح لجدي

مش قادرة اعبرلكو قد ايه اثرت فيا الزيارة ديه .. قد ايه وحشوني .. وقد ايه نفسي يبقو معانا

وقد ايه كبير الفراغ اللي اركوة في حياتنا .. فراغ .. مكنتش متصورة انهم هيسيبوة وراهم

افتقدت احساسي .. باني في اي وقت ممكن اروحلهم .. وهلاقي جدتي تفتحلي الباب

ويعملولي الشاي المميز بتاعهم

فاكراهم كويس اوي .. ووحشوني اوي

بكيت اوي علي قبرهم .. وكلمتهم .. كلمتهم كتير .. وقلتلهم انهم وحشوني ..

وحشوني اوي بجد :( .. ببكي حتي دلوقتي

احنا ليه مبنقدرش قيمة الاشخاص غير بعد ما يضيعو مننا

ليه مكنتش بزوركو اكتر ؟؟

ليه اوقات كنت بتنرفز من بعض تصرفاتكو ؟؟

ذكراكم جوايا .. بفتكركو في كل وقت .. بفتكركو وانتو كويسين .. وبفتكرك يا جدتي لما مرضتي ..وغسلتي ذنوبك كلها .. فاكراكي لما وصلتي لمرحلة .. كنتي بتطلبي فيها مننا ندعيلك ان ربنا يرحمك .. وفعلا رحمك .. رحمك اول ليلة في رمضان .. رحمك .. بعد ما نويتي الصيام .. وانتي اصلا مرضك مكنش بيسمحلك تاكلي شئ .. وعروقك اصبحت لا تقبل ( أبر) الجلو كوز

توفيتي عندنا .. ودخلت عليكي الاوضة علشان اتطمن عليكي .. وكانت روحك فارقت جسدك .. لكني ظنيتك نائمة


ربنا يرحمك يا حبيبتي


فاكراكو دائما .. شكلكو مش بيفارق ذهني .. شكلك يا جدو وانت قاعد علي الكرسي بتاعك .. دانا اصلا فاكرة شكلك كان ازاي زماااان وانا صغيرة .. كنت ببقي شايفاك طوووووويل .. وكنت بتروح مسجد الرحمة في كل فرض .. ونسمع صوت اذانك واحنا في البيت


فاكراك لما كنت بتجيلنا اول ما بنيجي من السفر .. وفاكرة لما عرفنا انك تعبت .. ومن ساعتها واحنا اللي بنجيلك .. فاكرة اخر سنين في عمرك اللي وصل ل 82 سنة .. فاكرة التعب اللي تعبت فيه .. تعب الهرم .. فاكراك لما توفت جدتي .. ونزلناك العربية علشان تروحو البيت .. فاكراني وانا حاضناك وانت بتبكي وانا اللي دلوقتي ببكي .. ببكي .. لانك وحشتني اوي .. وحشتني لحيتك البيضا الجميلة

فاكرة لبسك ..ورائحتك المميزة الجميلة

كانت فيك حتي وانت متوفي .. وقعدت جمبك لحد ما جم علشان يغسلوك .. ومكنتش متمالكة دموعي

مكنتش عايزة ابعد عنك .. ولا تبعد عننا .. بس ربنا هو اللي كان عايزك


فاكرة تعبك .. اللي وصل لدرجة كنا بندعيلك ان ربنا يرحمك .. فارقتنا في ليلة جميلة .. ليلة 27 رمضان

ربنا يرحمك يا حبيبي



أحسنتم لأمي .. وأحسنتم لنا .. ربنا يرحمكم


مش قادرة اكمل



يا راحلا عن الحياة وساكن في أضلعي

هل تسمعون توجعي وتوجع الدنيا معي


الله يعزكو .. كل اللي يقرا البوست ده .. مينسيش يدعي ليهم


Friday, September 14, 2007